சென்னையில் இருசக்கர வாகனங்களைத் திருடிய மூன்று இளைஞர்கள் கைது

சென்னையின் பல்வேறு இடங்களில் இருசக்கர வாகன திருட்டில் ஈடுபட்ட 3 பேரை கைது செய்த காவல்துறையினர் அவர்களிடமிருந்து 6 வாகனங்களைப் பறிமுதல் செய்தனர். சென்னை சாஸ்திரி நகர் பகுதியில் மூன்று இளைஞர்கள் இருசக்கர வாகனத்தை தள்ளிக் கொண்டு சென்றனர். அவர்களின் நடவடிக்கையில் சந்தேகமடைந்த ரோந்து காவலர்கள் அவர்களைத் தடுத்து நிறுத்தி விசாரணை நடத்தியபோது, மூவரும் தப்ப முயன்றனர்.

அப்போது ராஜூ என்பவரை விரட்டிப் பிடித்த காவல்துறையினர் அவரைக் கொண்டு மற்றவர்களையும் கைது செய்தனர். அவர்களிடம் நடத்தப்பட்ட விசாரணையில் இருசக்கர வாகனங்களைத் திருடிக் கொண்டு வந்தது தெரியவந்தது. இதையடுத்து அவர்களிடமிருந்து ஆறு இருசக்கர வாகனங்களை பறிமுதல் செய்த காவல்துறையினர் மூவரையும் நீதிமன்றத்தில் ஆஜர்படுத்தி சிறையிலடைத்தனர்.