ஜம்மு காஷ்மீரில் 3 தீவிரவாதிகள் சுட்டுக்கொலை

ஜம்மு காஷ்மீரின் டிரால் பகுதியில் பாதுகாப்புப் படையினர் மற்றும் தீவிரவாதிகள் இடையில் நடைபெற்ற துப்பாக்கிச்சூட்டில் 3 தீவிரவாதிகள் சுட்டுக் கொல்லப்பட்டனர்.

ஜம்மு காஷ்மீரில் தொடர்ந்து தீவிரவாதிகள் ஊடுருவல் நிகழ்ந்து வருகிறது. இந்நிலையில் புல்வாமா மாவட்டத்தில் உள்ள டிரால் பகுதியில் தீவிரவாதிகள் நடமாட்டம் இருப்பதாக கிடைத்த தகவலையடுத்து அப்பகுதியில் பாதுகாப்புப் படையினர் தீவிர சோதனையில் ஈடுபட்டனர். அப்பொழுது அந்தப்பகுதியில் ஒரு வீட்டில் மறைந்திருந்த தீவிரவாதிகள், திடீர் துப்பாக்கிச்சூட்டில் ஈடுபட்டனர்.

இதையடுத்து அந்த வீட்டை சுற்றி வளைத்த பாதுகாப்புப் படையினர், எதிர் தாக்குதலில் ஈடுபட்டனர். இருதரப்பினருக்கும் இடையில் தொடர்ந்து பலமணிநேரங்கள் நீடித்த இந்த துப்பாக்கிச்சூட்டில், 3 தீவிரவாதிகள் சுட்டுக் கொல்லப்பட்டனர்.

இதனிடையே, பாரமுல்லா மாவட்டத்தின் உரி செக்டாரில் பாகிஸ்தான் ராணுவத்தினர் அத்துமீறி துப்பாக்கிச்சூடு நடத்தியதில் பொதுமக்களில் 4 பேர் காயமடைந்தனர்.