ஓமன் மற்றும் ஐக்கிய அரபு அமீரகத்தில் நடைபெறும் டி-20 உலகக்கோப்பை போட்டிக்கான அட்டவணை வெளியாகியுள்ள நிலையில், அக்டோபர் 24ம் தேதி, துபாயில் நடைபெறும் போட்டியில், இந்தியா, பாகிஸ்தானை எதிர்கொள்கிறது.
கொரோனா தொற்று பரவல் காரணமாக கடந்த ஆண்டு நடைபெற வேண்டிய டி-20 கிரிக்கெட் போட்டிகள் ஒத்திவைக்கப்பட்டன. இதனைத் தொடர்ந்து, ஓமன் மற்றும் ஐக்கிய அரபு அமீரகத்தில், அக்டோபர் 17ம் தேதி முதல் நவம்பர் 14ம் தேதி வரை டி-20 உலகக் கோப்பை கிரிக்கெட் போட்டிகளை நடத்த, ஐ.சி.சி. திட்டமிட்டுள்ளது. அந்த போட்டிக்கான அட்டவணையை ஐசிசி வெளியிட்டுள்ள நிலையில், துபாயில் அக்டோபர் 24ம் தேதி நடைபெறும் போட்டியில், குரூப்-2 பிரிவில் இடம்பெற்றுள்ள இந்தியா, பாகிஸ்தான் அணிகள் பலப்பரீட்சை நடத்துகின்றன. தொடர்ந்து, அக்டோபர் 31ம் தேதி நியூஸிலாந்து அணியுடனும், நவம்பர் 3ம் தேதி ஆப்கனிஸ்தான் அணியுடனும் இந்தியா மோதுகிறது. டி-20 உலகக் கோப்பையின் முதல் அரையிறுதிப் போட்டி, நவம்பர் 10ம் தேதியும், இரண்டாவது அரையிறுதிப் போட்டி நவம்பர் 11ம் தேதியும் நடைபெறுகிறது. இறுதிப்போட்டி நவம்பர் 14ம் தேதி நடைபெறவுள்ளது.
Discussion about this post