வடமநிலங்களில் கனமழை பெய்து வருவதால் இயல்பு வாழ்க்கை பாதிக்கப்பட்டுள்ளது. மும்பையில் அடுத்த 48 மணி நேரத்திற்கு பலத்த மழைக்கு வாய்ப்பிருப்பதால் பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது.
தென்மேற்கு பருவ மழை காரணமாக கடந்த சில நாட்களாக குஜராத், பீகார் உள்ளிட்ட வட மாநிலங்களில் கனமழை பெய்து வருகிறது. இதனால் ஆறுகளில் வெள்ளப் பெருக்கு ஏற்பட்டுள்ளது. கடந்த இரண்டு நாட்களாக மும்பையில் தொடர்ந்து பெய்து வரும் கனமழையால் பல்வேறு பகுதிகளில் வெள்ளம் சூழ்ந்து காணப்படுகிறது. போக்குவரத்து முழுமையாக முடங்கி உள்ளதால் மக்களின் இயல்பு வாழ்க்கை பாதிக்கப்பட்டுள்ளது.
இந்நிலையில் மும்பையில் அடுத்த 48 மணி நேரத்திற்கு கனமழை தொடர வாய்ப்பிருப்பதாக வானிலை மையம் தெரிவித்துள்ளது. எனவே, பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது. தானே, ராஜ்காட், பகுதியில் உள்ள பள்ளி, கல்லூரிகளுக்கு நாளையும் விடுமுறை அறிவிக்கப்பட்டுள்ளது. தாழ்வான பகுதிகளில் வசிக்கும் மக்கள் பாதுகாப்பான இடங்களில் தங்க வைக்கப்பட்டுள்ளனர்.