சென்னையில் ஏற்பட்ட தீ விபத்தில் 30க்கும் மேற்பட்ட குடிசைகள் எரிந்து சாம்பல்

சென்னையில் அதிகாலையில் ஏற்பட்ட தீ விபத்தில் 30க்கும் மேற்பட்ட குடிசைகள் எரிந்து சாம்பலாகின.

சென்னை பட்டினம்பாக்கம் அடுத்த டுமீல் குப்பம் பகுதியில் ஏராளமான குடிசை வீடுகள் உள்ளன. இந்நிலையில், அந்தோணி என்பவரது வீட்டில் அதிகாலையில் மின் கசிவு ஏற்பட்டதால் தீ பற்றியது. இந்த தீ மற்ற குடிசைகளுக்கும் வேகமாக பரவியது. அப்போது இரண்டு சமையல் எரிவாயு சிலிண்டர்கள் பயங்கர சத்தத்துடன் வெடித்து சிதறின. இதனால் அச்சமடைந்த   மக்கள் வீடுகளை விட்டு வெளியேறினர். தேனாம்பேட்டை, பட்டினப்பாக்கம், அடையாறு தீயணைப்பு நிலையங்களில் இருந்து சம்பவ இடத்திற்கு வந்த தீயணைப்பு துறையினர் தீயை அணைத்தனர். இந்த விபத்தில் எந்த உயிர் சேதமும் ஏற்படவில்லை என்று தெரிவிக்கப்பட்டுள்ளது. வீடுகளில் இருந்த பொருட்கள் தீயில் கருகி நாசமடைந்தன.