ஐ.பி.எல் போட்டி: கிங்ஸ் லெவன் பஞ்சாபை வென்றது டெல்லி கேப்பிடல்ஸ்

கிங்ஸ் லெவன் பஞ்சாப் மற்றும் டெல்லி கேப்பிடல்ஸ் அணிகளுக்கு இடையேயான ஐ.பி.எல் போட்டியில் டெல்லி கேப்பிடல்ஸ் அணி வெற்றி பெற்றது.

டெல்லி கேப்பிடல்ஸ் மற்றும் கிங்ஸ் லெவன் பஞ்சாப் அணிகளுக்கு இடையேயான 37-வது லீக் போட்டி டெல்லியில் நடைபெற்றது. டாஸ் வென்ற டெல்லி அணி பந்து வீச்சைத் தேர்வு செய்தது. இதனையடுத்து பஞ்சாப் அணியின் சார்பில் லோகேஷ் ராகுல், கிரிஸ் கெயில் முதலாவதாக களமிறங்கினர். ராகுலும் மயங்க் அகர்வாலும் சொற்ப ரன்களில் வெளியேற, டேவிட் மில்லரும் 7 ரன்களில் அவுட் ஆனார். அதிரடியான ஆட்டத்தினை வெளிப்படுத்திய கிரிஸ் கெயில் 69 ரன்கள் எடுத்தார். 20 ஓவர்கள் முடிவில், பஞ்சாப் அணி 7 விக்கெட்டுகளை இழந்து 163 ரன்கள் எடுத்தது.

164 ரன்கள் எடுத்தால் வெற்றி என்ற இலக்குடன் களமிறங்கிய டெல்லி அணியில் பிரித்வி ஷா 13 ரன்களில் வெளியேறினார். சிறப்பான ஆட்டத்தை வெளிப்படுத்திய ஷிகார் தவான் 56 ரன்களில் கேட்ச் அவுட் ஆனார். அவரைத்தொடர்ந்து ரிஷாப் பண்ட் 6 ரன்னிலும், கொலின் இன்ங்ராம் 19 ரன்களிலும், அக்சர் பட்டேல் 1 ரன்னிலும் வெளியேறினர். பொறுப்பான ஆட்டத்தை வெளிப்படுத்திய கேப்டன் ஸ்ரேயாஸ் அய்யர் 58 ரன்கள் எடுத்து கடைசிவரை ஆட்டமிழக்காமல் களத்தில் இருந்தார். முடிவில் டெல்லி அணி 19 புள்ளி 4 ஒவர்களில் 5 விக்கெட்டுகளை இழந்து 166 ரன்கள் எடுத்து வெற்றி பெற்றது.