நாளை தொடங்கும் டெஸ்ட் சாம்பியன்ஷிப் தொடரின் முதல் போட்டியில் இந்தியா

இந்தியா மற்றும் மேற்கிந்திய தீவுகள் அணிகள் மோதும் முதலாவது டெஸ்ட் கிரிக்கெட் போட்டி ஆண்டிகுவாவில் நாளை தொடங்குகிறது.

விராட் கோலி தலைமையிலான இந்திய கிரிக்கெட் அணி மேற்கிந்திய தீவுகளில் சுற்றுப் பயணம் மேற்கொண்டு விளையாடி வருகிறது. முன்னதாக நடந்த 20 ஓவர் தொடர் மற்றும் ஒரு நாள் தொடரை இந்திய அணி கைப்பற்றியது. இந்தநிலையில், இரு அணிகளுக்கு இடையேயான 2 போட்டிகள் கொண்ட டெஸ்ட் தொடரில் விளையாட உள்ளது.

இதன் முதலாவது போட்டி ஆண்டிகுவாவில் உள்ள நார்த் சவுண்ட் மைதானத்தில் நாளை தொடங்குகிறது. ஜேசன் ஹோல்டர் தலைமையிலான மேற்கிந்திய தீவுகள் அணி, வலுவான இந்தியாவின் பந்து வீச்சில் தடுமாறி வருகிறது. குறிப்பாக அந்த அணியின் முன்னணி வீரர்கள் ரன்களை குவிக்க முடியாமல் திணறி வருகின்றனர். இதனால் மேற்கிந்திய தீவுகள் அணி டெஸ்ட் தொடரில் முழு திறமையையும் வெளிகாட்டும் முனைப்புடன் உள்ளது.

அந்த அணி கடந்த ஆண்டு இந்திய சுற்றுப்பயணத்தின் போது 2 போட்டியிலுமே தோல்வியடைந்தது குறிப்பிடத்தக்கது. அதேசமயம் டெஸ்ட் தொடரையும் கைப்பற்ற இந்திய அணி தீவிரம் காட்டும் என்பதால் இந்த போட்டி பரபரப்பாக இருக்கும் என ரசிகர்கள் எதிர்பார்த்துள்ளனர்.

இதனிடையே டெஸ்ட் சாம்பியன்ஷிப் தொடரில் முதல் போட்டியில் விளையாடும் இந்திய அணி வெற்றி பெற தீவிரம் காட்டி வருகிறது.