உலக கோப்பையில் பாகிஸ்தானை வீழ்த்தி வரலாற்றை தக்க வைத்த இந்தியா

உலக கோப்பை 22வது லீக் போட்டியில் 89 ரன்கள் வித்தியாசத்தில் பாகிஸ்தானை வென்ற இந்திய அணி வரலாற்றை தக்க வைத்தது.

12வது உலக கோப்பை போட்டி இங்கிலாந்தில் நடைபெற்று வருகிறது. ஓல்டு டிராஃப்போர்ட் மைதானத்தில் நடைபெற்ற போட்டியில் விராட் கோலி தலைமையிலான இந்திய அணியும், சர்ஃப்ராஸ் அகமத் தலைமையிலான பாகிஸ்தான் அணியும் விளையாடியது. டாஸ் வென்ற பாகிஸ்தான் அணி பந்து வீச்சை தேர்வு செய்தது. இதையடுத்து இந்திய அணியின் துவக்க வீரர்களான லோகேஷ் ராகுல், ரோஹித் சர்மா ஆகியோர் களம் இறங்கினர். இருவரும் சிறப்பான ஆட்டத்தை வெளிப்படுத்தி அணிக்கு வலுவான அடித்தளத்தை அமைத்துக் கொடுத்தனர். நிதானமான விளையாடிய ராகுல் 57 ரன்களில் ஆட்டமிழந்தார். அதிரடியாக விளையாடிய ரோஹித் சர்மா நடப்பு உலக கோப்பை தொடரில் 2வது சதத்தை பதிவு செய்தார். தொடர்ந்து அதிரடி காட்டிய ரோஹித் சர்மா 3 சிக்ஸர், 14 பவுண்டரிகளுடன் 140 ரன்கள் எடுத்திருந்த நிலையில் ஆட்டமிழந்தார். இதையடுத்து களமிறங்கிய வீரர்கள் குறைந்த ரன்களில் விக்கெட்டுகளை இழந்தனர். மறுமுனையில் நிலைத்து நின்று விளையாடிய கேப்டன் விராட் கோலி 77 ரன்களில் ஆட்டமிழந்தார். இந்திய அணி நிர்ணயிக்கப்பட்ட 50 ஓவர்களில் 5 விக்கெட்டுகளை இழந்து 336 ரன்கள் குவித்தது. பாகிஸ்தான் அணியின் சார்பில் அதிகபட்சமாக முகமது அமிர் 3 விக்கெட்டுகளை சாய்த்தார்.

337 ரன்கள் எடுத்தால் வெற்றி என்ற இலக்குடன் பாகிஸ்தான் அணியின் இமாம் உல் ஹக், பக்தர் சமான் ஆகியோர் தொடக்க ஆட்டக்காரர்களாக களமிறங்கினர். இமாம் உல் ஹக் 7 ரன்களில் வெளியேற, பக்தர் சமானுடன், பாபர் அசாம் ஜோடி சேர்ந்தார். இந்த ஜோடியின் சிறப்பான ஆட்டத்தால் பாகிஸ்தான் அணியின் ரன்ரேட் வேகமாக உயர்ந்தது. தொடர்ந்து சிறப்பாக ஆடிய பக்தர் சமான் தனது அரை சதத்தை பதிவுசெய்திருந்த நிலையில் 62 ரன்களில் ஆட்டமிழந்தார். மறுமுனையில் விளையாடிய பாபர் அசாம் 48 ரன்களில் வெளியேறினார். தொடர்ந்து அடுத்தடுத்து வந்த வீரர்கள் சொற்ப ரனிகளில் வெளியேறினர். இந்நிலையில் 35வது ஓவரில் மழை குறுக்கிட்டது. பின்னர் டக்வெர்த் லூவிஸ் விதிப்படி பாகிஸ்தான் அணிக்கு 40 ஓவர்களில் 302 ரன்கள் வெற்றி இலக்காக நிர்ணயிக்கப்பட்டது. இதன்படி 30 பந்துகளில் 136 ரன்கள் எடுக்க வேண்டிய நிலை ஏற்பட்டது. இறுதியில் பொறுப்பான ஆட்டத்தை வெளிப்படுத்திய இமாத் வாசிம் 46 ரன்களும், சதாப் கான் 20 ரன்களும் எடுத்து இறுதிவரை ஆட்டமிழக்காமல் களத்தில் இருந்தனர். ஆட்டத்தின் முடிவில் பாகிஸ்தான் அணி 40 ஓவர்களில் 6 விக்கெட்டுக்கு 212 ரன்கள் மட்டுகே எடுத்தது. இதன் மூலம் இந்திய அணி 89 ரன்கள் வித்தியாசத்தில் வெற்றிபெற்றது. இந்திய அணியின் சார்பில் அதிகபட்சமாக குல்தீப் யாதவ், ஹர்திக் பாண்ட்யா, விஜய் சங்கர் ஆகியோர் தலா 2 விக்கெட்டுகள் வீழ்த்தினர். இதன்மூலம் பாகிஸ்தான் அணிக்கு எதிரான ஆட்டத்தில் 89 ரன்கள் வித்தியாசத்தில் இந்திய அணி வெற்றிபெற்றது. ஆட்ட நாயகனாக ரோஹித் சர்மா தேர்வு செய்யப்பட்டார்.