சென்னையில் நகை கொள்ளையில் ஈடுபட்ட பவாரியா கும்பலைச் சேர்ந்த 10 பேர் கைது

சென்னையில் 120 சவரன் நகையைக் கொள்ளையடித்த பவாரியா கொள்ளைக் கும்பலைச் சேர்ந்த 10 பேரைக் காவல்துறையினர் கைது செய்துள்ளனர்.

சென்னை நங்கநல்லூரில் நேற்று முன்தினம் தொழிலதிபர் ரமேஷ் என்பவர் வீட்டில் 120 சவரன் தங்க நகைகள் மற்றும் ஒரு லட்ச ரூபாய் பணத்தையும் மர்ம நபர்கள் கொள்ளையடித்தனர். இந்த சம்பவம் தொடர்பாக அப்பகுதியில் உள்ள சிசிடிவி காட்சிகளை வைத்து தனிப்படை காவல்துறையினர் தேடிவந்தனர். இந்த நிலையில் நங்கநல்லூரில் இருந்து ஆட்டோ மூலம் பழவந்தாங்கல் ரயில் நிலையத்திற்குச் சென்ற கொள்ளையர்கள், அங்கிருந்து ரயில் மூலம் எழும்பூர் சென்றுள்ளனர். பின்னர் அங்கிருந்து மத்தியப் பிரதேசம் சென்றது தெரியவந்தது. இதையடுத்து பவாரியா கொள்ளைக் கும்பல் குறித்து மத்தியப் பிரதேசக் காவல்துறைக்குத் தகவல் தெரிவிக்கப்பட்டது. இதையடுத்து ரயிலில் சென்ற கொள்ளையர்கள் 10 பேரை மடக்கி உஜ்ஜைன் காவல்துறையினர் கைது செய்தனர். இதையடுத்து அவர்களைச் சென்னைக்கு அழைத்துவருவதற்காகத் தமிழகக் காவல்துறை தனிப்படையினர் மத்தியப் பிரதேசத்துக்கு விரைந்துள்ளனர்.