கந்துவட்டி கேட்டு கொடுமைப்படுத்திய திமுக பிரமுகர் கைது

கந்து வட்டி கொடுமையில்  அயனாவரத்தை சேர்ந்த திமுக பிரமுகர்  கைது செய்யப்பட்டு சிறையில் அடைக்கப்பட்டுள்ளார்.

சென்னை, அயனாவரம் பகுதியைச் சேர்ந்தவர் பாஸ்கர். திமுகவின் 98-வது வட்டச் செயலாளராக உள்ள இவர், சசிகுமார் என்பவருக்கு 1 லட்சம் ரூபாய்க்கு 30 ஆயிரம் ரூபாயை வட்டியாக பிடித்துக் கொண்டு, 70 ஆயிரம் ரூபாய் கொடுத்ததாகவும் தெரிகிறது. 6 மாதங்கள் கடந்த நிலையில், பணம் கேட்டு சசிகுமார் வீட்டுக்கு சென்ற பாஸ்கர், தகராறில் ஈடுபட்டதாக தெரிகிறது. சசிகுமாரின் மனைவியை தகாத வார்த்தைகளால் திட்டியதாகவும் கூறப்படுகிறது. இதனால் கோபமடைந்த சசிகுமார், கடந்த 3 நாட்களுக்கு முன்பு பாஸ்கரின் அலுவலகத்துக்கு வந்து, அங்கிருந்த கண்ணாடி மீது கற்களால் வீசி தாக்கியுள்ளார். இந்த சம்பவம் குறித்து வழக்குப்பதிவு செய்த போலீசார், சசிகுமாரை கைது செய்துள்ளனர். மேலும், கந்து வட்டி கொடுமைப்படுத்திய பாஸ்கரையும் போலீசார் கைது செய்து சிறையில் அடைத்தனர்.