ஆழியார் பகுதியில் சுற்றித்திரியும் ஒற்றை யானை

பொள்ளாச்சி அருகே உள்ள ஆழியார் பகுதியில் சுற்றித்திரியும், மதம்பிடித்த ஒற்றை யானையை காட்டிற்குள் விரட்ட வனத்துறையினர் போராடி வருகின்றனர்.

பொள்ளாச்சியை அடுத்துள்ள ஆழியார் பகுதியில்  வனத்தை விட்டு வெளியேறிய யானை ஒன்று மதம் பிடித்த நிலையில் சுற்றித்திரிந்து வருகிறது. இந்த யானை வால்பாறை மலைச் சாலையில் ஓரத்தில் வைக்கப்பட்டுள்ள அறிவிப்பு பலகைகளை உடைத்ததோடு, வனத்துறை சார்பில் வைக்கபட்டுள்ள செயல் விளக்க கட்டிடங்களையும் இடித்து சேதப்படுத்தியுள்ளது.

மேலும், அந்த காட்டு யானை நவமலையில் உள்ள தென்னந்தோப்புக்குள் புகுந்து தென்னை மரங்களை சேதப்படுத்தியும் வருகிறது. இந்நிலையில், வனத்துறையினர் பட்டாசுகள் வெடித்து யானையைக் காட்டிற்குள் விரட்ட போராடி வருகின்றனர். ஒற்றைக் காட்டுயானையின் நடமாட்டத்தால் அப்பகுதி வழியாக செல்லும் வாகன ஓட்டிகளும் பொதுமக்களும் அச்சமடைந்துள்ளனர்.