மதுகுடிக்க பணம் தராததால் பாட்டியை அரிவாளால் வெட்டிக் கொலை செய்த பேரன்

மதுகுடிக்க பணம் தராததால், சொந்தப் பேரனே, 105 வயது பாட்டியைக் அரிவாளால் வெட்டிக் கொலை செய்த கொடூரம், விருதுநகர் அருகே நிகழ்ந்துள்ளது.

விருதுநகர் மாவட்டம் காரியாபட்டி அருகே தோணுகால் கிராமத்தைச் சேர்ந்தவர் பாலமுருகன். இவர் எந்த வேலைக்கும் செல்லாமல் மது மற்றும் கஞ்சா பழக்கத்துக்கு அடிமையாகி ஊரைச் சுற்றியதாக கூறப்படுகிறது. இந்நிலையில் பாலமுருகன் நேற்று தனது பெற்றோரிடம் மது குடிக்க பணம் கேட்டுள்ளார். ஆனால் பாலமுருகனின் பெற்றோர் பணம் தரமுடியாது எனக் கூறியதுடன் அவரை திட்டியுள்ளனர்.

பெற்றோர் பணம் தராத ஆத்திரத்தில் பாலமுருகன் அவர்களுடன் சண்டையிட்டு தனது 105 வயது பாட்டி கருப்பாயியிடம் சென்று பணம் கேட்டுள்ளார். ஆனால் பாட்டி கருப்பாயி நீ குடிப்பதற்குத் தான் பணம் கேட்பாய் உனக்கு பணம் தரமுடியாது ஒழுங்காக வேலைக்கு செல்… என கூறி பணம் தர மறுத்துள்ளார். இதனால்மேலும் ஆத்திரமடைந்த பாலமுருகன் அருகிலிருந்த அரிவாள்மனையை எடுத்து பாட்டியின் கழுத்து மற்றும் தலை பகுதியில் கொடூரமாக வெட்டி கொலை செய்துவிட்டு, கருப்பாயி காதில் அணிந்திருந்த தோடை காதோடு அறுத்து எடுத்து கையில் வைத்துக்கொண்டு அதே இடத்தில் அமைதியாக அமர்ந்துள்ளார்.

பாட்டியின் அலறல் சத்தம் கேட்டு ஓடி வந்து பார்த்த அக்கம்பக்கத்தினர் கருப்பாயி கொலை செய்யப்பட்டு இருப்பதை கண்டு உடனடியாக மல்லாங்கிணறு காவல் நிலையத்திற்கு தகவல் தெரிவித்தனர். தகவல் அறிந்து விரைந்து வந்த மல்லாங்கிணறு காவல்துறையினர் கருப்பாயியின் உடலை கைப்பற்றி பிரேத பரிசோதனைக்காக அருப்புக்கோட்டை அரசு மருத்துவமனைக்கு அனுப்பி வைத்தனர். கொலை செய்துவிட்டு எதுவும் நடக்காதது போல் பாட்டியின் உடலின் அருகே அமைதியாக அமர்ந்திருந்த இருந்த பேரன் பாலமுருகனை காவல்துறையினர் கைது செய்தனர். சொந்தப்பேரனே பாட்டியைக் கொடூரமாக கொலை செய்த சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது.