அதிமுக பொதுக்குழு, செயற்குழு இன்று நடைபெறுகிறது

அதிமுக பொதுக்குழு, செயற்குழு கூட்டமானது, இன்று சென்னை வானகரம் ஸ்ரீ வாரு மண்டபத்தில் நடைபெற உள்ளது.

அதிமுக பொதுக்குழு, செயற்குழு கூட்டம் அவைத்தலைவர் மதுசூதனன் தலைமையில் நடைபெற உள்ளது. இந்த செயற்குழு மற்றும் பொதுக்குழு கூட்டத்திற்கு, செயற்குழு உறுப்பினர்களாக சுமார் 370 பேரும், பொதுக்குழு உறுப்பினர்களாக சுமார் 2ஆயிரம் பேரும், இவர்களை தவிர சிறப்பு அழைப்பாளர்கள் என்ற நிலையில் சுமார் இரண்டாயிரத்திற்கும் அதிகமானோர் பொதுக்குழுவில் கலந்துகொள்கின்றனர். இந்தக் கூட்டத்தில் கலந்து கொள்ளவுள்ள முதலமைச்சர், துணை முதலமைச்சர் மற்றும் அமைச்சர் பெருமக்களை வரவேற்க, சிறப்பான ஏற்பாடுகள் செய்யப்பட்டுள்ளன. இந்த கூட்டத்தில், உள்ளாட்சித் தேர்தல் வியூகம் உள்ளிட்ட பல்வேறு விஷயங்கள் பற்றி ஆலோசனை செய்யப்பட உள்ளதாக கூறப்படுகிறது. வாழை மர தோரணங்கள், வரவேற்பு பலகைகள் என பல்வேறு சிறப்பு ஏற்பாடுகள் செய்யப்பட்டு, வானகரத்தில் உள்ள ஸ்ரீவாரு திருமண மண்டபம், விழாக்கோலம் பூண்டுள்ளது.