பாகிஸ்தான் அணியின் தேர்வுக் குழு தலைவர் பதவியிலிருந்து விலகிய இன்சமாம் உல் ஹக்

உலக கோப்பை தொடர் தோல்வி எதிரொலியாக பாகிஸ்தான் அணியின் தேர்வுக் குழு தலைவர் பொறுப்பிலிருந்து இன்சமாம் உல் ஹக் பதவி விலகினார்.

இன்சமாம் உல் ஹக் கடந்த 2016-ம் ஆண்டு ஏப்ரல் மாதம் பாகிஸ்தான் கிரிக்கெட் அணியின் தேர்வு குழு தலைவராக பொறுப்பேற்றுக் கொண்டார்.அண்மையில் இங்கிலாந்தில் நடந்து முடிந்த உலக கோப்பை தொடருக்கான பாகிஸ்தான் கிரிக்கெட் அணி அறிவிக்கப்பட்டது. தேர்வுக் குழு தலைவரான இன்சமாம் உல் ஹக், சர்ஃப்ராஸ் அகமது தலைமையிலான அணியை தேர்வு செய்தார். இதையடுத்து உலக கோப்பையில் பாகிஸ்தான் விளையாடிய 8 லீக் போட்டிகளில் 5 ல் வெற்றி கண்டு லீக் சுற்றோடு வெளியேறியது. இதனால் பாகிஸ்தான் அணி கடும் விமர்சனத்திற்கு உள்ளான நிலையில், தேர்வுக் குழு தலைவரான இன்சமாம் உல் ஹக் பதவி விலகுவதாக அறிவித்தார். இம்மாதம் 31 ஆம் தேதியுடன் இவரது பதவிக் காலம் முடிவடைய உள்ள நிலையில் முன்னதாக பதவி விலகியது அந்நாட்டு கிரிக்கெட் வட்டாரத்தில் பரபரப்பை ஏற்படுத்தியுள்ளது.