மாலை 6 மணியுடன் ஓய்ந்தது மக்களவை தேர்தல் பிரசாரம்

மக்களவை இறுதிக்கட்ட தேர்தல் மற்றும் 4 தொகுதி இடைத்தேர்தலுக்கான பிரசாரம் மாலை 6 மணியுடன் நிறைவடைந்தது.

மக்களவைக்கு கடந்த ஏப்ரல் 11 முதல் மே மாதம் 19 வரை 7 கட்டங்களாக தேர்தல் நடத்த திட்டமிடப்பட்டது. 6 கட்ட தேர்தல் நடைபெற்றுள்ள நிலையில் இறுதிகட்ட தேர்தல் நாளை மறுநாள் நடைபெற உள்ளது. மேற்கு வங்கம், பஞ்சாப் உள்ளிட்ட 8 மாநிலங்களில் உள்ள 59 தொகுதிகளுக்கு 19ஆம் தேதி வாக்குப்பதிவு நடைபெற உள்ளது. இதையடுத்து தலைவர்கள் உச்சகட்ட பிரசாரத்தில் ஈடுபட்டனர். தமிழகத்தில் வரும் 19ஆம் தேதி அரவக்குறிச்சி, ஓட்டப்பிடாரம், திருப்பரங்குன்றம், சூலூர் ஆகிய தொகுதிகளுக்கு இடைத்தேர்தல் நடைபெற உள்ளது. முதலமைச்சர் எடப்பாடி பழனிசாமி, துணை முதலமைச்சர் ஓ.பன்னீர்செல்வம் மற்றும் கூட்டணி கட்சி தலைவர்கள் அதிமுக வேட்பாளர்களுக்கு ஆதரவாக தீவிர வாக்கு சேகரிப்பில் ஈடுபட்டனர். 19ஆம் தேதி வாக்குப்பதிவு நடைபெற இருப்பதால் நாடு முழுவதும் அனைத்து தொகுதிகளுக்கும் மாலை 6 மணியுடன் பிரசாரம் நிறைவடைந்தது.