ஐபிஎல் பிளே ஆஃப் சுற்றில் சென்னை-மும்பை இன்று பலப்பரீட்சை

12-வது ஐபிஎல் போட்டிகளில் பிளே ஆஃப் சுற்றுகள் இன்று தொடங்குகின்றன. முதல் ஆட்டத்தில் மும்பை – சென்னை அணிகள் பலப்பரீட்சை நடத்துகின்றன.

மார்ச் 23 ஆம் தேதி தொடங்கிய 12-வது ஐபிஎல் போட்டிகளில் லீக் சுற்றுகள் அனைத்தும் முடிவுற்று இன்று பிளே ஆஃப் சுற்றுகள் தொடங்குகிறது. பிளே அஃப் சுற்றுக்கு மும்பை இந்தியன்ஸ், சென்னை சூப்பர் கிங்ஸ், டெல்லி கேப்பிட்டல்ஸ் மற்றும் சன் ரைசர்ஸ் ஹைதராபாத் ஆகிய அணிகள் புள்ளிப் பட்டியலில் முதல் நான்கு இடங்களை பிடித்து தேர்வாகியுள்ளன.

சென்னை சேப்பாக்கம் விளையாட்டு மைதானத்தில் இன்று இரவு 7.30 மணியளவில் தொடங்கும் முதல் பிளே ஆஃப் சுற்று போட்டியில் தோனி தலைமையிலான சென்னை சூப்பர் கிங்ஸ் அணி மற்றும் ரோகித் ஷர்மா தலைமையிலான மும்பை இந்தியன்ஸ் அணிகள் மோதுகின்றன. மேலும் இந்த ஆட்டத்தில் வெற்றி பெறும் அணி நேரடியாக இறுதிப்போட்டிக்கும், தோல்வியுறும் அணி 2-வது தகுதி சுற்றில் விளையாடும் என்பதும் குறிப்பிடத்தக்கது. எனவே, இந்தப் போட்டியில் சென்னை அணி வெற்றி பெற்று இறுதிப் போட்டிக்கு தகுதி பெறுமா? என்ற எதிர்பார்ப்பு எழுந்துள்ளது.