வாக்குச்சாவடி மையத்தை தாண்டி நீண்ட வரிசையில் நிற்கும் பொதுமக்கள்

மக்களவை தேர்தலின் 4ம் கட்ட வாக்குப்பதிவில் காலை 11 மணி நிலவரப்படி 23 புள்ளி 82 சதவீத வாக்குகள் பதிவாகியுள்ளன.

மகாராஷ்டிரா மாநிலத்தில் உள்ள 48 தொகுதிகளுக்கு இன்று ஒரே கட்டமாக வாக்குப்பதிவு நடைபெற்று வருகிறது. பீகாரில் 5 தொகுதிகளுக்கும் உத்தரப்பிரதேசத்தில் உள்ள 13 தொகுதிகளுக்கும், ஒடிசாவில் உள்ள 21 தொகுதிகளுக்கும் வாக்குப்பதிவு நடைபெறுகின்றது. இதேபோல் ராஜஸ்தான், மேற்கு வங்கம், ஜார்கண்ட், மத்திய பிரதேசம் ஆகிய மாநிலங்களிலும் இன்று காலை 7 மணி முதல் வாக்குப்பதிவு நடைபெற்று வருகிறது. 71 மக்களவை தொகுதிகளில் நடைபெறும் இன்றைய தேர்தலில் சுமார் 12 கோடியே 79 லட்சம் பேர் வாக்களிக்க உள்ளனர். முன்னதாக வாக்குச்சாவடிகளில் வைக்கப்பட்டுள்ள மின்னணு வாக்குப்பதிவு இயந்திரங்கள் அரசியல் பிரமுகர்கள் முன்னிலையில் பரிசோதிக்கப்பட்டன. பதற்றமான வாக்குச்சாவடிகளில் மாநில போலீசாருடன் இணைந்து துணை ராணுவத்தினரும் பாதுகாப்பு பணியை மேற்கொண்டுள்ளனர்.

இதனிடையே வடகிழக்கு மும்பை மக்களவை தொகுதிக்குட்பட்ட போவை, சந்திவாலி பகுதிகளில் பொதுமக்கள் நீண்ட வரிசையில் நின்று வாக்களித்தனர். நகரங்களை பொறுத்தவரை பொதுமக்கள் பெரும்பாலும் வாக்களிக்க விரும்புவதில்லை என்ற கருத்து நிலவி வரும் நிலையில், வாக்குச்சாவடி மையத்தை தாண்டியும் பொதுமக்கள் நீண்ட வரிசையில் நின்றனர். இதனை அவ்வழியாக சென்ற சிலர் தங்களின் ஸ்மார்ட் போன்களில் வீடியோ எடுத்து முகநூல் உள்ளிட்ட சமூக வலைதளங்களிலும் பகிர்ந்தனர்.

இதனிடையே மேற்குவங்க மாநிலம் அசான்சோலில் உள்ள வாக்குச்சாவடிகளில் திரிணாமுல் காங்கிரஸ் மற்றும் பாதுகாப்பு படையினரிடையே வாக்குவாதம் ஏற்பட்டது. இதனையடுத்து கூட்டத்தை கலைக்க பாதுகாப்பு படையினர் தடியடி நடத்தினர். இதனால் அப்பகுதியில் சற்று பரபரப்பான சூழல் உருவானது.