ஐபில் போட்டியில் இன்று சென்னை-ஐதரபாத் அணிகள் மோதல்

ஐபிஎல் போட்டியின் லீக் ஆட்டத்தில் சென்னை சூப்பர் கிங்ஸ் – சன் ரைசர்ஸ் ஐதராபாத் அணிகள் இன்று மோதுகின்றன.

ஐபிஎல் தொடரின் 12வது சீசன் இந்தியாவின் பல்வேறு பகுதிகளில் நடைபெற்று வருகிறது. 56 போட்டிகள் கொண்ட இந்த தொடரில் 32 போட்டிகள் நிறைவடைந்துள்ள நிலையில், 33வது போட்டியில் தோனி தலைமையிலான சென்னை சூப்பர் கிங்ஸ் அணியும், கேன் வில்லியம்சன் தலைமையிலான சன் ரைசர்ஸ் அணியும் இன்று மோதுகின்றன. ஐதராபாத்தில் உள்ள ராஜீவ்காந்தி சர்வதேச மைதானத்தில் இரு அணிகளும் 3 போட்டிகளில் கலந்து கொண்டுள்ளன. அதில் சென்னை சூப்பர் கிங்ஸ் அணி 2 போட்டிகளிலும், ஐதராபாத் 1 போட்டியிலும் வெற்றி பெற்றுள்ளன. தொடர் வெற்றிகளை குவித்து வரும் சென்னை அணி, தங்களை வீழ்த்த எதிரணிக்கு எந்த வாய்ப்பும் கொடுக்காமல் சிறப்பான ஆட்டத்தை வெளிப்படுத்தி வருகிறது. ஐபிஎல் கோப்பையை வெல்லும் முனைப்புடன் விளையாடி வரும் சென்னை அணி, இன்றைய போட்டியிலும் முத்திரை பதிக்குமா என்ற எதிர்பார்ப்பு ரசிகர்கள் மத்தியில் எழுந்துள்ளது.