கிருஷ்ணகிரி மாவட்டம் சூளகிரி அருகே நள்ளிரவில் சிறுத்தை கடித்து 8 செம்மறி ஆடுகள் பலியான சம்பவம் கிராம மக்களிடையே அச்சத்தை ஏற்படுத்தியுள்ளது.
சூளகிரி அருகே பலவதிம்மனப்பள்ளியை சேர்ந்த விவசாயி மல்லப்பா, வனப்பகுதியை ஒட்டியுள்ள தனது விவசாய நிலத்தில் 22 செம்மறி ஆடுகளை வளர்த்து வந்தார். இந்நிலையில் நள்ளிரவில் ஆடுகள் அலறும் சத்தம் கேட்டு வெளியில் வந்த அவர், 8 செம்மறி ஆடுகள் இறந்து கிடந்ததை கண்டு அதிர்ச்சி அடைந்தார். மேலும் 14 ஆடுகள் காயமடைந்துள்ளன.
இதையடுத்து அவரது அலறலை கேட்டு, அருகிலிருந்தவர்கள் ஓடி வந்துள்ளனர். வனப்பகுதியில் இருந்து வந்த சிறுத்தை இந்த தாக்குதலில் ஈடுபட்டிருக்கலாம் என்று சம்பவ இடத்தில் ஆய்வு மேற்கொண்ட வனத்துறையினர் தெரிவித்தனர்.
இந்த தாக்குதல் சம்பவம் அப்பகுதி மக்களிடையே அச்சத்தை ஏற்படுத்தியுள்ளது. ஆடுகளை தாக்கிய சிறுத்தை, ஊரிலுள்ள குழந்தைகளையும் தாக்கக்கூடும் என்பதால், வனத்துறையினர் உடனடி நடவடிக்கை எடுக்க அவர்கள் கோரிக்கை விடுத்துள்ளனர்.
Discussion about this post