தொடர் திருட்டில் ஈடுபட்டு வந்த கொள்ளையன் கைது – 137 சவரன் மீட்பு

தமிழகம் முழுவதும் தொடர் திருட்டில் ஈடுபட்டு வந்த கொள்ளையனைக் காவல் துறையினர் கோவையில் கைது செய்துள்ளனர்.

கோவை துடியலூரை அடுத்துள்ள இடையார்பாளையத்தைச் சேர்ந்தவர் கனகராஜ். கடந்த மாதம் 19 ஆம் தேதி இவர் வீட்டைப் பூட்டி விட்டு வெளியே சென்றிருந்தபோது பூட்டை உடைத்து, 137 பவுன் நகைகளை மர்ம நபர்கள் கொள்ளையடித்துச் சென்றனர். இதுகுறித்து காவல் நிலையத்தில் புகார் அளிக்கப்பட்டது. காவல் துறையினர் வழக்குப்பதிவு செய்து, கொள்ளைக் கும்பலை பிடிக்க 4 தனிப்படை அமைத்து, தீவிர விசாரணை நடத்தி வந்தனர்.

இந்த நிலையில், அந்த பகுதியில் சுற்றித் திரிந்த ஒருவரை சந்தேகத்தின் பேரில் தனிப்படை காவல்துறையினர் பிடித்து விசாரித்தனர். அப்போது, அவர் பெயர் ராஜசேகரன் என்பதும், கனகராஜ் வீட்டில் கொள்ளையடித்தவர் என்பதும் தெரியவந்தது. அவர் தமிழகம் முழுவதும் பல்வேறு இடங்களில் கொள்ளையில் ஈடுபட்டதும் தெரியவந்தது. இதனையடுத்து காவல் துறையினர் அவரைக் கைது செய்து, அவரிடமிருந்து 137 சவரன் நகையைப் பறிமுதல் செய்தனர்.