ரோஜர் பெடரர் அதிர்ச்சி தோல்வி

நியுயார்க்கில் நடைபெற்று வரும் அமெரிக்க ஓபன் டென்னிஸ் போட்டிகள் விறுவிறுப்பான கட்டத்தை எட்டியுள்ளன. ஆடவர் ஒற்றையர் பிரிவு நான்காவது சுற்றில், முன்னணி வீரரான ரோஜர் பெடரர், ஆஸ்திரேலியாவை சேர்ந்த ஜான் மில்மேனை எதிர்கொண்டார். 5 முறை அமெரிக்க ஒபன் டென்னிஸ் பட்டத்தை வென்றுள்ள பெடரரை, 3-6, 7-5, 7-6, 7-6 என்ற செட் கணக்கில், வீழ்த்திய மில்மேன் காலிறுதிக்கு தகுதி பெற்றார்.

நான்காவது சுற்று ஆட்டத்தில், செர்பியாவைச் சேர்ந்த நோவாக் ஜோகோவிச்சும், போர்ச்சுக்கலைச் சேர்ந்த ஜோ சவுசாவும் மோதினர். சிறப்பான ஆட்டத்தை வெளிப்படுத்திய ஜோகோவிச், 6-3, 6-4, 6-3 என்ற நேர் செட்களில் வெற்றி பெற்று காலிறுதிக்கு முன்னேறினார்.

ஜெர்மனியின் பிலிப் கோல்சேபரை நேர் செட் கணக்கில் வீழ்த்திய ஜப்பானின் நிஷிகோரியும் காலிறுதிக்குள் நுழைந்தார். மகளிர் ஒற்றையர் பிரிவில் ஸ்லோவாக்கியாவின் சிபுல்கோவாவை வீழ்த்தி, அமெரிக்காவின் மடிசன் கீஸ் காலிறுதிக்கு தகுதி பெற்றுள்ளார்.