சென்னையில் மெட்ரோ ரயில் நிறுவன ஊழியர்கள் வேலை நிறுத்தத்தில் ஈடுபட்டுள்ள நிலையில், ரயில் சேவை மீண்டும் சீராகி இருப்பதாக நிர்வாகம் தெரிவித்துள்ளது.
சென்னையில் மெட்ரோ ரயில் நிர்வாகத்துக்கு எதிராக செயல்பட்ட 8 ஊழியர்கள் பணியிடை நீக்கம் செய்யப்பட்டனர். இதற்கு எதிர்ப்பு தெரிவித்து நேற்று முன்தினம் மெட்ரோ தலைமையகத்தை முற்றுகையிட்டு போராட்டத்தில் ஈடுபட்டனர். இதனால், ரயில் சேவை பாதிக்கப்பட்டது. 2வது நாளாக நேற்றும் மெட்ரோ ஊழியர்கள் வேலைநிறுத்த போராட்டத்தில் ஈடுபட்டதால், ரயில் சேவை முடங்கியது. இதனால், பயணிகள் சிரமத்திற்கு ஆளாகினர். இந்தநிலையில், 3வது நாளாக மெட்ரோ ரயில் ஊழியர்கள் வேலைநிறுத்த போராட்டத்தில் ஈடுபட்டுள்ளனர். இதனால், காலையில் சிறிது நேரம் ரயில் சேவை பாதிக்கப்பட்டது. தற்போது அட்டவணைப்படி மெட்ரோ ரயில்கள் இயக்கப்பட்டு வருவதாக நிர்வாகம் தரப்பில் தெரிவிக்கப்பட்டுள்ளது. இதனிடையே, பிரச்னைக்கு தீர்வு காண இன்று மீண்டும் முத்தரப்பு பேச்சுவார்த்தை நடத்தப்படுகிறது.