சென்னையை அடுத்த தாம்பரத்தில் தனியார் பள்ளி வளாகம் அருகே தீப்பிடித்து புகை மண்டலம் எழுந்ததால் அவசர அவரசரமாக மாணவர்கள் வெளியேற்றப்பட்டனர்.
மண்ணிவாக்கம் தனியார் பள்ளி அருகே உள்ள காலி இடத்தில் திடீரென தீப்பற்றி எரிந்தது. மளமளவென எரிந்த தீயானது புல், குப்பைகளில் பிடித்து பெரும் புகை மூட்டத்தை ஏற்படுத்தியது. இந்த புகை மூட்டமானது காற்றின் வேகம் காரணமாக பள்ளி வளாகத்திற்குள் பரவியது. இதனால் மாணவர்கள் மூச்சுத்திணறலால் கடுமையாக பாதிக்கப்பட்டனர்.
இதையடுத்து பள்ளி நிர்வாகம் முன் எச்சரிக்கை நடவடிக்கையாக மாணவர்களை வெளியேற்றினர். தீ விபத்து குறித்து தகவலறிந்த தாம்பரம் தீயணைப்பு படையினர் தீயை அனைத்தனர். இந்த நிலையில் மாணவர்களின் பெற்றோர் பள்ளி முன்பு குவிந்ததால் மேலும் பரபரப்பு ஏற்பட்டது. காலி இடத்தில் இருந்த மின் மாற்றி வெடித்ததால் தீ விபத்து ஏற்பட்டதாக கூறப்படுகிறது.