சென்னை அரும்பாக்கத்தில் பட்டப்பகலில் ரவுடி வெட்டிக்கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.
சென்னை சூளைமேடு நமச்சிவாயபுரத்தை சேர்ந்தவர் குமரேசன். இவர் மீது பல்வேறு கொலை வழக்குகள் உள்ளன. இந்நிலையில் யுவராஜ் என்பவரை கொலை செய்த வழக்கில் பூந்தமல்லி நீதிமன்றத்தில் ஆஜாகிவிட்டு குமரேசன் வீடு திரும்பிக் கொண்டிருந்தார்.
அரும்பாக்கத்தில் உள்ள தனியார் கல்லூரி அருகே வந்து கொண்டிருந்த குமரேசனை, 4 பேர் கொண்ட கும்பல் வழிமறித்து சரமாரியாக தாக்கியது. இதில் நிலைகுலைந்த குமரேசன் சம்பவ இடத்திலேயே உயிரிழந்தார். தகவல் அறிந்து வந்த போலீசார், குமரேசனின் உடலை கைப்பற்றி மருத்துவமனைக்கு அனுப்பி வைத்தனர். கொலை செய்துவிட்டு தப்பியோடிய மர்ம கும்பலை போலீசார் தீவிரமாக தேடிவருகின்றனர்.