ஈரோட்டில் பணத்திற்காக வடமாநில இளைஞர் துண்டு துண்டாக வெட்டிக் கொலை செய்யப்பட்டது தொடர்பாக இரண்டு பேரிடம் போலீசார் விசாரணை மேற்கொண்டுள்ளனர்.
பீகாரை சேர்ந்த நவீன்குமார் தனது மனைவியுடன் வீரப்பன்சத்திரத்தில் வசித்து வருகிறார். இந்நிலையில் திண்டுக்கல் மாவட்டம் குஜிலியாம் பாறையில் வேலை பார்த்து வந்த பீகாரை சேர்ந்த நிதீஷ்குமாருடன் அவருக்கு பழக்கம் ஏற்பட்டது.
இந்நிலையில் சில தினங்களுக்கு முன்பு நிதீஷ்குமாரை தொடர்பு கொண்ட நவீன், தனது நிறுவனத்தில் அதிக சம்பளத்தில் வேலை வாங்கித் தருவதாக கூறியுள்ளார். இதை நம்பி நிதீஷ்குமார் ஈரோட்டிற்கு வந்து நவீனை சந்தித்துள்ளார். அப்பொழுது அவரை மிரட்டி 2 லட்சம் ரூபாய் தரவேண்டும் என்றும் இல்லையென்றால் கொலை செய்து விடுவோம் என்று நவீன்குமாரும், அவரது மனைவியும் மிரட்டியுள்ளனர்.
இதனிடையே நிதீஷ்குமாரை காணவில்லை என அவரது தாயார் காவல்நிலையத்தில் புகார் அளித்ததையடுத்து போலீசார் தேடுதல் வேட்டையில் ஈடுபட்டு, சந்தேகத்தின் பேரில் நவீனின் வீட்டில் சோதனை நடத்தினர். அங்கு நிதீஷ்குமாரின் உடல் துண்டுதுண்டாக வெட்டப்பட்ட நிலையில் கண்டெடுக்கப்பட்டது. இதுகுறித்து நவீன் மற்றும் அவரது மனைவியிடம் போலீசார் விசாரணை மேற்கொண்டுள்ளனர். மேலும் ராகுல் என்பவரையும் போலீசார் தேடி வருகின்றனர்.