சென்னை மயிலாப்பூர் மற்றும் சுற்றுப்புற பகுதிகளில் 5 இடங்களில் தொடர் சங்கிலி பறிப்பில் ஈடுபட்ட 2 குற்றவாளிகளை பிடிக்க, காவல்துறையினர் தனிப்படை அமைத்து தீவிர தேடுதல் வேட்டையில் ஈடுபட்டுள்ளனர்.
கடந்த ஞாயிற்றுக்கிழமை காலையில் சென்னையின் ராயப்பேட்டை, மயிலாப்பூர், கோட்டூர்புரம், ஐஸ் அவுஸ் மற்றும் தேனாம்பேட்டை ஆகிய 5 இடங்களில் இரு சக்கர வாகனத்தில் சென்ற 2 நபர்கள் தொடர்ந்து சங்கிலி பறிப்பில் ஈடுபட்டுள்ளனர்.
விசாரணையில் அவர்கள் பயன்படுத்திய இருசக்கர வாகனமானது, மயிலாப்பூர் பகுதியில் திருடப்பட்டது என தெரியவந்துள்ளது. மேலும் அந்த இரு சக்கர வாகனத்தை ஓட்டிய நபர் தலைக்கவசம் அணிந்து வாகனத்தை ஓட்ட, பின்னால் அமர்ந்து சென்ற நபர், தனியாக நடந்து சென்று கொண்டிருந்த பெண்களிடம் சங்கிலி பறிப்பில் ஈடுபட்டுள்ளது, சம்பவ இடங்களில் உள்ள சிசிடிவி கேமராக்களின் பதிவுகளை ஆய்வு செய்ததில் தெரிய வந்துள்ளது. இதன் அடிப்படையில், தற்போது காவல்துறையினர் தனிப்படை அமைத்து தீவிர தேடுதல் வேட்டையில் ஈடுபட்டுள்ளனர்.